ਵੀਅਤਨਾਮ ਵਿੱਚ ਦਰਦਨਾਕ ਹਾਦਸਾ: ਫੂ ਕੁਓਕ ਟਾਪੂ ਨੇੜੇ ਸਪੀਡਬੋਟ ਪਲਟੀ,

ਹਨੋਈ/ਫੂ ਕੁਓਕ, 11 ਜੁਲਾਈ: ਵੀਅਤਨਾਮ ਦੇ ਪ੍ਰਸਿੱਧ ਸੈਲਾਨੀ ਟਾਪੂ ਫੂ ਕੁਓਕ (Phu Quoc) ਦੇ ਨੇੜੇ ਸ਼ਨੀਵਾਰ ਨੂੰ ਇੱਕ ਦਰਦਨਾਕ ਹਾਦਸਾ ਵਾਪਰ ਗਿਆ, ਜਿੱਥੇ ਭਾਰਤੀ ਸੈਲਾਨੀਆਂ ਨੂੰ ਲੈ ਕੇ ਜਾ ਰਹੀ ਇੱਕ ਸਪੀਡਬੋਟ ਸਮੁੰਦਰ ਵਿੱਚ ਪਲਟ ਗਈ। ਇਸ ਹਾਦਸੇ ਵਿੱਚ ਘੱਟੋ-ਘੱਟ 15 ਭਾਰਤੀ ਸੈਲਾਨੀਆਂ ਦੀ ਮੌਤ ਹੋ ਗਈ, ਜਦਕਿ 21 ਲੋਕਾਂ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ, ਹਾਲਾਂਕਿ ਕੁਝ ਜ਼ਖ਼ਮੀ ਹਨ।

ਰਿਪੋਰਟਾਂ ਮੁਤਾਬਕ ਸਪੀਡਬੋਟ ਵਿੱਚ 32 ਭਾਰਤੀ ਸੈਲਾਨੀ ਅਤੇ 4 ਚਾਲਕ ਦਲ ਦੇ ਮੈਂਬਰ ਸਵਾਰ ਸਨ। ਇਹ ਬੋਟ ਹੋਨ ਮੇ ਰੁਟ (Hon May Rut) ਟਾਪੂ ਤੋਂ ਐਨ ਥੋਈ (An Thoi) ਬੰਦਰਗਾਹ ਵੱਲ ਵਾਪਸ ਆ ਰਹੀ ਸੀ, ਜਦੋਂ ਤੇਜ਼ ਹਵਾਵਾਂ ਅਤੇ ਉੱਚੀਆਂ ਲਹਿਰਾਂ ਕਾਰਨ ਤਟ ਤੋਂ ਲਗਭਗ 400 ਮੀਟਰ ਦੂਰ ਪਲਟ ਗਈ।

ਹਾਦਸੇ ਤੋਂ ਤੁਰੰਤ ਬਾਅਦ ਸਥਾਨਕ ਬਚਾਅ ਟੀਮਾਂ, ਕੋਸਟ ਗਾਰਡ ਅਤੇ ਨੇੜਲੇ ਜਹਾਜ਼ਾਂ ਨੇ ਰਾਹਤ ਅਤੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤੇ। ਕਈ ਯਾਤਰੀ ਬੋਟ ਦੇ ਅੰਦਰ ਫਸ ਗਏ ਸਨ, ਜਿਸ ਕਾਰਨ ਮੌਤਾਂ ਦੀ ਗਿਣਤੀ ਵਧ ਗਈ।

ਭਾਰਤ ਦੇ ਵੀਅਤਨਾਮ ਸਥਿਤ ਦੂਤਾਵਾਸ ਨੇ ਇਸ ਘਟਨਾ ‘ਤੇ ਦੁੱਖ ਪ੍ਰਗਟ ਕਰਦਿਆਂ ਹੋ ਚੀ ਮਿਨ੍ਹ ਸਿਟੀ ਅਤੇ ਹਨੋਈ ਵਿੱਚ ਕੰਟਰੋਲ ਰੂਮ ਸਥਾਪਿਤ ਕੀਤੇ ਹਨ, ਤਾਂ ਜੋ ਪ੍ਰਭਾਵਿਤ ਪਰਿਵਾਰਾਂ ਨੂੰ ਜਾਣਕਾਰੀ ਅਤੇ ਹਰ ਸੰਭਵ ਸਹਾਇਤਾ ਮੁਹੱਈਆ ਕਰਵਾਈ ਜਾ ਸਕੇ। ਉਧਰ, ਵੀਅਤਨਾਮ ਸਰਕਾਰ ਨੇ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਦੇ ਹੁਕਮ ਜਾਰੀ ਕਰ ਦਿੱਤੇ ਹਨ।

• ਹੋ ਚੀ ਮਿਨ੍ਹ ਸਿਟੀ ਕੰਟਰੋਲ ਰੂਮ: +84 36 281 7930, +84 91 552 37 14, +84 33 452 0414

• ਹਨੋਈ ਕੰਟਰੋਲ ਰੂਮ: +84 91 308 9165